Act 25 | PONPDN | STEP | PESTUS lao pwarador nan wei, ap kotidalan Ierusalem san Sasarea ni ran kasilu.

Acts 25

1 PESTUS lao pwarador nan wei, ap kotidalan Ierusalem san Sasarea ni ran kasilu. 2 Samero lapalap o saumas akan en Sus oko ap pwara don re a weiweiloke Paulus o poekipoeki re a, 3 O inon ion konekon re a, pwen palian Paulus, pwe a en wa don Ierusalem i, a re masamasani i, pwen kamele ni a kotikot kodo. 4 A Pestus masani, me Paulus pan mimieta Sasarea, a pein i pan madan masel wei. 5 A me lapalap re omail pan kak ian ia kodila o kadede ol o, ma dip a mia. 6 A lao kotikot re ’rail pon walu pon de naul, ap kotidilan Sasarea o mandan ran o a kaipokedi pon mol en kadeik o masani, Paulus en wisikedo. 7 A lao pwarador, Sus oko, me kodido san Ierusalem, ap kapil pena i o kadipe i kaualap, ap sota kak kadededa. 8 Pwe Paulus kotin sapen masani duen pein i: I sota wiadar dipi on kapun en Sus oko, de on im en kaudok o, de on Sisa. 9 A Pestus men konekon ren Sus oko, ap sapen Paulus masani: Koe men kodalan Ierusalem, pwen pakadeikada re i wasa o? 10 A Paulus kotin masani: I mi mon mol en kadeik en Sisa, wasa me mau on, i en pakadei kada. Sota me sapun eu, me i wiai on Sus oko, duen me pein komui mani. 11 Ma i wiadar sapun eu de mekot me waron kamela, i sota pan kan mela. A ma so melel, me mepukat kine kin ia, sota me pan kak pan ia lan irail. I dorolan Sisa! 12 Pestus lao kalelapok ren momod en kadeik o, ap masani: Koe dorolan Sisa, ari koe pan pwarala ren Sisa. 13 Murin ran akai nanmarki Akripa o Pernise koti don Sasarea, pwen ranamau on Pestus. 14 Ira lao kotikot wasa o pon loto, Pestus ap kaireki nanmarki duen Paulus masani: Ol sensal amen mi met, me Peliks saliedi ap samalar. 15 A samero lapalap o saumas en Sus akan kaire kin ia duen i ni ai potopot Ierusalem inon ion I en kadeikada i. 16 A nai sapen irail: Kaidin duen tiak en men Rom, en panala aramas amen, en kamela, mon me panala i kan saikenta sansal mo a, o a muei on i er, en sapen duen me re pan kila i. 17 Irail lao pokon don met, a mandan ran o i madan mondi pon mol en kadeik o inda, ol o en wisikedo. 18 A me panala i kan lao pwarado, re sota katitiki mesued kot, duen i kiki on. 19 A akai peipeidok mia duen pein arail lamalam o duen ol mela amen me ad a Iesus, me Paulus kin inda, me dene a memaureta. 20 Nai ari poneponeki duen mepukat, i ap idok re a, ma a sota men kodalan Ierusalem, pwen pakadeikada wasa o duen mepukat. 21 A Paulus lao dorolan kadeik en Aukustus, nai ap inda, ren koledi i, i lao kadarala i ren Sisa. 22 Akripa ap masani on Pestus: I pil men roneron aramas o. A masani: Lakap kom pan ron i. 23 A mandan ran o Akripa i Pernise lao kotin pwarado ni ar kapwat linan kaualap o kotilon on nan im en kapun, o ol lapalap akan ianaki kaun en kanim o, Pestus ap masani, Paulus en wisikedo. 24 A Pestus masani: Main nanmarki Akripa o komail ol akan karos, me ian kit kotikot wasa et, komail masani, pweki men et, Sus akan karos kin poekipoeki re i nan Ierusalem o pil met; ni ar palian i indada, me dene a sowar on memaureta. 25 A i lao diarada, me sota me a wiadar, me war on kamela o pein i dorolan Aukustus, nai ap kileledier me i pan kadarala i. 26 A sota me i asa, en intiniedi won nai saupeidi. I me i waki don komail i, mo ’mui ta main nanmarki Akripa, pwe kapun lao nikier, i en asa, da me i en intinieki wei. 27 Pwe i lamelame, me sapun, en kadarala me salidi amen, ap sota kaireki duen karep en salidi.